你知道嗎??

咁快又一年有多，這段日子話長唔長，話短唔短，總之我好難過。

我地分左手之後，其實我有問過我自己想點？一世唔理佢、唔睬佢？定係好似個傻佬咁係度等？就連哩個問題我自己都答唔到。
我知道佢要做手術，個心總會替佢有點擔心，不竟大家係埋一段唔短既日子。係個做手術前，我鼓起勇氣，將扎原本係情人節送既花送左比佢，但係張情人節咭到依都未送。
係分手之後半年，佢終於揾番我，佢仲約我出街，不過我始終冇去。之後大家斷斷續續都有聯絡，直到去年既7月某一個星期五晚，我地終於可以坐底食餐飯見面，果晚表面上我好開心，其實我好想喊，我好眼淺。雖然，我唔知佢諗緊乜，當時亦唔知道大家係咩關係，我只係同佢講左一句，"你仲知道我對你點"。但係，佢竟然同我講，話佢冇後悔喎，天呀，唔好咁啦..........。

之後，大家都有單獨出過嚟食次飯，我亦都買過幾份佢一定鍾意既禮物比佢，連佢開聲想睇李克勤演唱會，我都係網上拍賣度買番哩比佢，仲要買多隻cookie公仔親自送去比佢，咁算唔話得啦。有一晚食飯，我見佢去左廁所，我靜靜放左我本日記落佢個袋比佢睇。隔左一排，佢寫個sms比我，話比我知好感動，但係感動，我可以點呢？佢成日講，話過左去冇辨法啦，大家只不過係好朋友，叫我唔好對佢咁好。點解佢要咁講呀，我好唔開心架。

如是者，大家既關係拉鋸左一段時間，偶然只得一個半個電話傾吓。而去年最後一次傾話係我生日前一日，之後大家冇聯絡過。

今年年頭，知道李克勤會係農曆年開個人演唱會，問佢去唔去睇，我初頭以為會去，原來我太天真了，佢竟然話係因為我而鍾意李克勤，佢又插多我一刀，點解呀？睇演唱會果日，啱啱好係年初二，因有煙花表演關係，演唱會比平時遲左一個鐘先至會開，係等緊入場期間，接到一個冇來電顥示既電話，我所有電都接，接左，喂完都唔出聲，跟住仲收埋我線，我心諗，會唔會係佢呢，我好希望係佢啦，其實果時我都幾掛住佢架。

我知道我依家做乜都冇用，我想取回本日記，我想寫，我想寫番近哩年既嘢，但係佢始終佢都唔肯出嚟，唯有我係哩度寫住先。其實，我仲有樣生日禮物送比佢，唔止我親手做張生日比佢咁簡單，但係到目前為止都未送到，我好失敗。雖然唔係乜貴重物品，只不過係我一點心意。

我成日反覆想量，係咪我對佢唔夠好呢？定我做佢"老公"做得唔夠好呢？其實佢想要既嘢我有做，只不過時機未成熟，我未同佢講，同埋想比個十排佢呀。

打到哩度，我個心好酸、好痛，個腦一段段開心既片段浮現出嚟，唉...........點算。

我係咪太過白痴呢？我係咪有d比佢帶住走呢？我對佢點？我對依家都唔知。如果佢有睇到既話，可唔以覆我呀？佢睇完我本日記有乜感覺，我都想知呀。